![]()
Сонгинохайрхан дүүрэг, 6-р хороонд байрлалтай Гэр бүлийн хэрэгцээний 2155мкв газар худалдана.
#1 ЦЭВДЭГТЭЙ ГАЗАР
Цэвдэг гэдэг нь газрын гүний тодорхой төвшинд хоёроос дээш жилд, тэгээс доош хэмд оршдог хөрс чулуулаг юм. 2016 оны судалгаагаар Монгол орны нийт нутаг дэвсгэрийн 29.3 хувийг цэвдэг эзэлдэг хэмээн тодорхойлсон.
Цэвдэгтэй газарт үл хөдлөх хөрөнгө, барилга байгууламж барихад барилгын төсөвт өртгийг нэмэгдүүлдэг төдийгүй технологийн шийдлийг оновчтой шийдээгүйгээс болж барилгын насжилт, чанар зэрэгт нөлөөлдөг.
#2 ХӨРСНИЙ БОХИРДОЛ
Хот суурин газар, түүний орчимд газар худалдан авахад анхаарах шаардлагатай зүйлийн нэг нь хөрсний бохирдол юм. Хөрс нь гадаргууд хаягдсан хуурай, нойтон хогоор бохирдохоос гадна агаарт дэгдсэн бусад бодисоор бохирддог.
Хөрсний химийн бохирдол нь хүнд металл, цацраг идэвхт бодис, эрдэс бордооны үлдэгдэл зэргээр бохирдуулдаг бол биологийн бохирдол нь мал амьтны сэг зэм, төрөл бүрийн хортой нян бактерийн үлдэгдлээр бохирддог.
Бохирдол ихтэй газарт амьдрах нь эрүүл мэндэд сөргөөр нөлөөлж зарим төрлийн өвчин үүсгэх магадлалтай. Тиймээс та худалдан авах гэж буй газрынхаа газрын төлөв байдал чанарын хянан баталгааны дүгнэлттэй заавал танилцаарай.
#3 БИЧИГ БАРИМТЫН БҮРДЭЛ
Газар худалдан авахад бичиг баримтын бүрдэл нь зайлшгүй анхаарах шаардлагатай асуудал юм. Газар эзэмших, ашиглах эрхийн гэрчилгээ, гэрээ, кадастрын зураг, Газрын төлөв, байдал чанарын улсын хянан баталгааны дүгнэлт нь зайлшгүй байх бичиг баримтын бүрдэл юм.
#4 ГАЗРЫН ЗОРИУЛАЛТ
Газар эзэмших, ашиглах гэрчилгээ, гэрээнд зааж өгсөн зориулалт нь цаашид таны тухайн газрыг ашиглах зориулалт гэж ойлгож болно. Энэ нь цаашид таны газар ашиглах, газартаа хөрөнгө оруулах зорилго, чиглэлтэй уялдсан байх ёстой бөгөөд хэрэв өөр байх нөхцөлд та зориулалтыг өөрчлүүлэх захирамж шийдвэр гаргуулах шаардлага тулгарна. Жишээлбэл Мод үржүүлгийн зориулалттай газар худалдаж авчхаад аялал жуулчлалын үйл ажиллагаа явуулж болохгүй.
#5 ТӨЛӨВЛӨЛТӨД ОРСОН ЭСЭХ
Хотын хөгжлийн төлөвлөлт, хэсэгчилсэн ерөнхий төлөвлөгөөг харгалзаж үзэх нь таныг тухайн газраа тогтвортой хугацаанд ашиглах нэг баталгаа болж өгнө. Энгийнээр тайлбарлавал та тухайн газрыг худалдан авсан ч тодорхой хугацааны дараа дахин төлөвлөлтөд орж дахин төлөвлөлтийн төсөл хэрэгжүүлэгчид худалдах шаардлага гарахыг үгүйсгэхгүй.
#6 ОРЦ, ГАРЦ, ЗАМ
Иргэн таны худалдаж авсан газар бусдын газрыг хаадаггүй, эсвэл бусдын хашаагаар дамжиж ордог байх ёсгүй. Нүдээр харахад орц, гарцын асуудалгүй мэт боловч кадастрын зураг дээр нэгнийгээ хаасан байдалтай байгаа эсэхийг ч нягтлах хэрэгтэй.
Хэрэв таны худалдан авсан газар нь аль нэг албан байгууллага, айлын хашааны орц гарцыг хаасан, эсвэл таны газрын орц, гарцыг хаасан өөр эзэмшигч, ашиглагч бүхий газар байх нь үл хөдлөх хөрөнгийн онцлог зохицуулалтыг (сервитут) шаарддаг гэдгийг анхаарах хэрэгтэй.
#7 ТУСГАЙ ХАМГААЛАЛТТАЙ ГАЗАРТ
Тусгай хамгаалалттай газар нутагт газар ашиглах тодорхой зориулалтууд байдаг бөгөөд та тусгай хамгаалалттай газар худалдан авсан бол зөвхөн тухайн зориулалтаар ашиглахаас гадна хэзээ ч өмчилж авах боломжгүй гэдгийг анхаарах шаардлагатай. Мөн тусгай хамгаалалттай газарт газар ашигласны төлбөр нь бусад газраас 2-3 дахин өндөр байдаг.
#8 ОЙН БОЛОН УСАН САН БҮХИЙ ГАЗАРТ
Ойн болон усан сан бүхий газарт тэдгээрийн хамгаалалтын болон хязгаарлалтын бүсэд газар худалдан авах нь зарим талаар хүндрэлтэй нөхцөл байдлыг үүсгэдэг. Мөн хэзээ ч эзэмшиж, ашиглаж буй газраа өмчлөх боломжгүй.
Ойтой ойролцоо газар гал түймрийн аюул өндөртэй бол усан сан бүхий газрын хувьд үерт автах, намагжилт үүсэх, улирлын хөлдөлт гэсэлтийн нөлөөнд өртөх эрсдэлүүд үүсдэг байна.
#9 ТАТВАР, ТӨЛБӨРИЙН ХЭМЖЭЭ
Монгол улсад газар өмчилж, газар, эзэмшиж ашиглаж буй иргэн, аж ахуйн нэгж бүр газрын татвар, төлбөрөөс чөлөөлөгдөх заасан нөхцөл, шаардлагад хамрагдаагүй бол заавал татвар, төлбөр төлөх эрх зүйн зохицуулалттай. Таны худалдан авсан газрын хэмжээ, зориулалт, байршлаас хамааран газрын төлбөр ногдуулалт хийгддэг. Та газар худалдан авахдаа улиралд төлөх газрын төлбөрийн дүн, газрын төлбөр тооцоо нийлсэн актыг урьдчилан шалгаж үзэх нь зүйтэй.
#10 КАДАСТРЫН МЭДЭЭЛЛИЙН САНГААС ЛАВЛАХ
Газар худалдан авах гэж байгаа бол тухайн газрынхаа талаар дэлгэрэнгүй, тодорхой, үнэн зөв, албан ёсны мэдээлэлтэй байх нь хамгийн чухал. Тэгвэл та худалдаж авах гэж буй газрынхаа нэгж талбарын дугаарыг мэдэж байхад хангалттай. Та тэрхүү нэгж талбарын дугаарыг www.egazar.gov.mn сайтын хайлтын хэсэгт оруулснаар тухайн газартай холбоотой дээр дурдсан мэдээллүүдийг харах боломжтой болох юм.
Газрын талаарх үнэн зөв, баталгаатай мэдээллийг олж авах боломжийг Газар зохион байгуулалт, Геодези Зураг Зүйн Газрын www.egazar.govmn цахим систем танд олгоно.