2022-11-30
Салто де Кастро гэх Испанийн тосгоныг 260,000 еврогоор зарахаар болжээ
Бүхнээ зараад өөр улс руу нүүхийг мөрөөддөг бол бүхэл бүтэн тосгоныг худалдаж авах санал гарч ирвэл та яах вэ?
Испанийн баруун хойд хэсэгт орших Салто де Кастрог худалдах тухай зар нийтлэгдсэн бөгөөд санал болгож буй үнэ нь 260,000 евро юм. (Өөрөөр хэлбэл 227,000 фунт стерлинг; 259,000 доллартой дүйцэхүйц)
Замора мужид Португалтай хиллэдэг, Мадридаас гурван цагийн зайтай орших Сальто де Кастро нь Испанийн түүх соёлыг шингээсэн олон жижиг барилга байгууламжтай үзэсгэлэнтэй бүтжээ.
Энэхүү тосгонд нийт 44 байшин, зочид буудал, сүм, сургууль, хотын усан бассейн, тэр байтугай дайны үед баригдаж байсан урт хуарангийн барилга ч багтдаг мөн ажээ.
Ийнхүү бүхий л зүйл багтсан гэмээр ч энд тосгоны оршин суугчид л дутаж буй юм. Сальто де Кастро гуч гаруй жилийн өмнөөс олны хөлөөс хол хаягдсан тосгон болж хувирчээ.
2000-аад оны эхээр тосгоныг аялал жуулчлалын газар болгох санаатайгаар одоогийн эзэн нь худалдаж авсан ч европ бүсийн хямрал энэхүү гайхалтай төлөвлөгөөг хэрэгжүүлэхэд саад болов.
Рояал Инвестмент компанийн төлөөлөгч Ронни Родригес, "Одоогийн өмчлөгч нь энд зочид буудалтай болохыг үргэлж мөрөөддөг байсан ч бүгд түр зогсонги байдалтай болсон. Гэвч түүний хүсэл мохоогүй бөгөөд одоо ч гэсэн энэхүү төслөө хэрэгжүүлэхийг хүсдэг." гэв.
Үл хөдлөх хөрөнгийн борлуулалтын Идеалиста вэбсайт дээр өдгөө 80 гаруй настай энэхүү тосгоны эзэн,"Би их хотын амьдралд илүү дасан зохицсон хүн тул энэхүү тосгоноо цаашид арчилж тордож чадахааргүй болсон" гэдгээ мэдэгджээ.
Долоохон хоногийн өмнө л энэхүү тосгон нь худалдаанд гарсан боловч барагцаагаар 50,000 гаруй зочдын анхаарлыг татаад байна.
Ноён Родригес хэлэхдээ Орос, Франц, Бельги, Их Британиас нийт 300 гаруй хүн худалдан авах саналтай байгаа гэв. Мөн эдгээрийн дундаас нэгэн боломжит худалдан авагч урьдчилгаа мөнгөө ч байршуулсан гэжээ.
1950-иад оны эхэн үед цахилгаан эрчим хүчний компани болох Ибердуэгийн хажууханд байрлах усан санг барьж байсан нийт ажилчдын гэр бүлд зориулж Салто де Кастро тосгоноо бүтээж байв.
Гэвч усан сан баригдаж дууссаны дараа оршин суугчид нүүж, 1980-аад оны сүүлээр тосгон бүрэн хаягдсан түүхтэй.
Үүний зэргэлдээ газар нутаг нь "хоосон Испани" гэж нэрлэгддэг бөгөөд үүнд харьяалагдах хот, суурин газруудад олон үйлчилгээ хөгжөөгүй, хүн ам сийрэг суурьшсан хөдөө тосгон юм.
Та илүү дэлгэрэнгүй мэдээлэл үзэхийг хүсвэл: Испанийн хаягдсан жижиг тосгонуудыг зарах тухай орж сонирхоорой.Салто де Кастро өмнө нь 6,5 сая еврогоор худалдаалагдаж байсан. Хэдий тийм ч худалдан авагчдын сонирхолд төдийлөн нийцээгүй хийгээд олон барилга нь эвдэрсэн тул ийнхүү үнэ цэн нь огцом унасан байна.
260,000 еврогийн үнэ нь Мадрид эсвэл Барселонагийн өндөр зэрэглэлийн газруудад нэг өрөө байр авахад л хангалттай хэмжээний зардал юм.
Тиймээс Салто де Кастрогийг худалдан авагч цаашид зочлох аялагчдыг татахын тулд илүү их ч санхүүжилт хэрэг болохыг үгүйсгэхгүй.
Идеалиста-ийн хэлснээр: "Энэхүү тосгоныг 100% ажиллагаа болгон, ашигтай орлого олж эхлэхэд нийт шаардагдах хөрөнгө оруулалт нь 2 сая евротой тэнцэхүйц." гэсэн зөвлөгөөг ч мөн нэмж дурджээ.